• MyPassion
ठाणे शहरात मोबाइल व्हॅनवर बंदी .
15 Jun, 2019

ठाणे शहरातील मोबाइल व्हॅनवरील जाहिरातींमुळे नागरिकांचा जीव धोक्यात आला असून या वाहनांना पावसाळ्यात जाहिरातीला बंदी करण्यात आली आहे. शहरातील अवाढव्य जाहिरात फलक कोसळण्याच्या घटनेच्या पार्श्वभूमीवर सुरक्षेच्या दृष्टीने ठाणे महापालिका आयुक्तांनी हा निर्णय घेतला आहे. शहरातील सर्व वाहनांवरील जाहिराती तात्काळ काढून त्यांना सुरक्षित ठिकाणी स्थलांतरित करण्याची कारवाई प्रशासनाकडून सुरू करण्यात आली आहे. त्यामुळे दुर्घटनांचा धोका टळला असून या संदर्भातील नागरिकांच्या सातत्यपूर्ण पाठपुराव्याला यश आले आहे. पुण्यात धोकादायक होर्डिंग कोसळून झालेली दुर्घटना आणि गुरुवारी ठाण्यामध्ये एसटी आगाराच्या परिसरातील होर्डिंग कोसळण्याच्या अपघाताच्या पार्श्वभूमीवर शहरातील जाहिरात मोबाइल व्हॅनचा प्रश्न ऐरणीवर आला होता. आरटीओच्या परवानगीशिवाय ही वाहने चालविली जात असल्यामुळे त्यांच्यावर कारवाई करण्याचे आदेश आरटीओ अधिकाऱ्यांनी संबंधित पथकांना दिले आहेत. त्यामुळे ही जाहिरात वाहने अडचणीत आली होती. महापालिकेने याची दखल घेऊन धोकादायक ठरणारी ही वाहने पावसाळ्यात बंद करण्याचे निश्चित केले आहे. कलरकेम कंपनी, गांधीनगर, सुभाषनगर, माजिवडा, पूर्व द्रुतगती महामार्ग, रहेजा कॉम्प्लेक्स, वसंत विहार, बटाटा कंपनी, कॅडबरी नाका, लिरीडा हॉटेल, पोखरण रोड नं. १ रेमंड कंपनी जवळ, समतानगर नाका व मुल्लाबाग येथील मोबाइल व्हॅन तसेच ट्रॉलीवरील जाहिरात फलक काढण्यात आले आहेत, अशी माहिती महापालिकेकडून देण्यात आली आहे. ही सगळी वाहने उड्डाणपुलाच्या खालील मोकळ्या जागेत हलविण्यात आली असून ट्रॉलीवरील जाहिरात फलक ट्रॉलीच्या तळावर उतरविण्यात आले आहेत. त्यामुळे पावसाळ्याच्या काळात या वाहनांमुळे कोणतीही दुर्घटना घडणार नसल्याचा दावा प्रशासनाकडून करण्यात आला आहे.