• MyPassion
घोडबंदर रोडवरील फ्लॅटमधून ठाणे पोलिसांनी केली लाखोंची रोकड जप्त
19 Oct, 2019

लोकशाहीर अण्णा भाऊ साठे महामंडळातील आर्थिक घोटाळ्याप्रकरणी मागील चार वर्षांपासून तुरुंगात असलेला आणि सोलापूर जिल्ह्यातील मोहोळ विधानसभा मतदारसंघातील अपक्ष उमेदवार रमेश कदम ठाणे पोलिसांना घोडबंदर रोडवरील एका फ्लॅटमध्ये आढल्याने खळबळ उडाली आहे. या फ्लॅटमध्ये त्याच्यासोबत आणखी एक जण होता. धक्कादायक बाब म्हणजे या फ्लॅटमधून लाखोंची रोकडही जप्त करण्यात आली. पोलिस बंदोबस्त असतानाही कदम दुसरीकडे गेलाच कसा, याबाबत प्रश्नचिन्ह निर्माण झाले आहे.रमेश कदम हा सध्या न्यायालयीन कोठडीत असून, त्याला ठाणे मध्यवर्ती तुरुंगात ठेवण्यात आले आहे. शुक्रवारी त्याला डॉक्टरांच्या सल्ल्यानुसार वैद्यकीय तपासणीसाठी पोलिस बंदोबस्तात मुंबईतील जे.जे. रुग्णालयात नेण्यात आले होते. तपासणीनंतर डॉक्टरांनी येत्या सोमवारी पुन्हा उपचारासाठी घेऊन येण्याबाबत सांगितले. त्यामुळे पोलिस बंदोबस्तात कदमला ठाणे तुरुंगात आणले जात होते. मात्र पोलिस एस्कॉर्ट पथकाच्या प्रभारी अधिकाऱ्यांनी कदमला तुरुंगात घेऊन न जाता खासगी गाडीने घोडबंदर रोडवरील ओवळा येथील पुष्पांजली रेसिडन्सी या सोसायटीमधील तिसऱ्या मजल्यावर असलेल्या फ्लॅटमध्ये आणले. याची माहिती मिळाल्यानंतर ठाणे पोलिसांनी फ्लॅटवर छापा टाकला असता कदम आणि राजू खरे हे दोघे ५३ लाख ४६ हजार रुपयांसह आढळून आले.जप्त केलेली रक्कम आपली असून, ती विधानसभा निवडणूक लढवण्यासाठी जमवल्याचे खरे याने सांगितले. या रकमेबाबत प्राप्तिकर विभागाला माहिती देण्यात आली असून, खरेला पुढील चौकशीसाठी शनिवारी सकाळी १० वाजता ठाण्यातील प्राप्तिकर विभागाच्या कार्यालयात कागदपत्रे घेऊन उपस्थित राहण्यास समन्स बजावण्यात आले आहे. ही रक्कम ट्रेझरीमध्ये जमा करण्यात आली आहे.