• MyPassion
डाक अदालतीमध्ये ठाणे विभागातून दोन वर्षांत एकच तक्रार दाखल.
14 May, 2019

टपाल वेळेत न मिळणे, स्पीड पोस्ट, डाक वस्तू, पार्सल, बचतबँक, मनी ऑर्डर असो किंवा काऊंटरची सेवा या विषय[ असलेल्या तक्रारींचे निवारण दीड महिन्यात न झाल्यास ती तक्रार डाक अदालतमध्ये मांडण्यात येते. पोस्टाच्या वेगवेगळ्या सेवांबाबत अनेक तक्रारी असल्या तरी डाक अदालतमध्ये ठाणे विभागातून गेल्या दोन वर्षांत केवळ एकच तक्रार दाखल असल्याची माहिती पुढे आली आहे. ठाण्यातील अनेक पोस्ट कार्यालयात ग्राहकांना अधिकाधिक सुविधा पुरविण्याचा प्रयत्न केला जात आहे. ऑनलाइन तक्रार, स्पीड पोस्ट, बिल भरणा, ऑनलाइन बिल पेमेंट असो किंवा कर्जाचा हप्ता, एटीएम, पार्सल, ट्रॅकर या नव्या हायटेक प्रणालीचा भाग बनत आहेत. हजारो लोकांचा दररोज पोस्ट कार्यालयाशी संपर्क येतो. पोस्टाशी संबंधित अनेक तक्रारी ग्राहक करत असतात. मग त्यामध्ये विशेषत: स्पीड पोस्ट, टपाल वेळेत न मिळणे, पार्सलची सेवा, मनिऑर्डर असो किंवा इतर सेवांबाबत उद्भवलेल्या तक्रारी विचारात घेतल्या जातात. मात्र या तक्रारीचे निवारण सहा आठवड्यांमध्ये न झाल्यास ही तक्रार डाक अदालतमध्ये मांडण्यात येते. ठाण्यात २०१७ -१८ मध्ये डाक अदालतीमध्ये एनसीसी प्रमाणपत्रासंदर्भात एक तक्रार दाखल होती. ती तक्रार निकाली काढण्यात आली असून २०१८-१९मध्ये एकही तक्रार डाक अदालतपर्यंत गेलेली नाही. या ठाणे विभागात ठाणे, वज्रेश्वरी, गणेशपुरी, भाईंदर, मिरा रोड या परिसरातील पोस्ट कार्यालयांचा समावेश आहे. डाक अदालतीमध्ये तक्रारकर्त्यांनी स्वत:चे संपूर्ण नाव पत्ता तसेच संपर्कासाठी दूरध्वनी क्रमांक देणे आवश्यक आहे. तसेच सुरुवातीला केलेल्या तक्रारीबद्दल ज्या अधिकाऱ्याकडे त्यांनी तक्रार नोंदवली असेल त्यांचे नाव व पद यांची माहिती याचबरोबर तक्रार केल्याची तारीख आणि मूळ तक्रारीची छायाप्रत जोडणे आवश्यक आहे.